काठमाडौं, २७ असार । मिकेल मेरिनोले खेलको अन्तिम समयमा निर्णायक गोल गर्दै स्पेनलाई बेल्जियममाथि २–१ को रोमाञ्चक जित दिलाएका छन्। यससँगै स्पेन फिफा विश्वकपको सेमिफाइनलमा प्रवेश गरेको छ।

१–१ को बराबरीतर्फ अघि बढिरहेको खेलको ८८औँ मिनेटमा वैकल्पिक खेलाडी मेरिनोले निर्णायक गोल गरे। पाउ कुबार्सीको करिब २५ गज टाढाबाट आएको प्रहार बेल्जियमका वैकल्पिक गोलरक्षक सेन्ने लामेन्सले नियन्त्रणमा लिन नसक्दा फर्किएको बललाई मेरिनोले सहजै जाली चुमाएका थिए। उनी डानी ओल्मोको स्थानमा मैदान प्रवेश गरेको मात्र ११७ सेकेन्डमै गोल गर्न सफल भए।स्पेनले खेलको ३०औँ मिनेटमा अग्रता लिएको थियो। पेड्रो पोरो र लामिन यमालबीचको उत्कृष्ट तालमेलपछि सिर्जना भएको अवसरमा डानी ओल्मोको पहिलो प्रहार थिबाउट कुर्टुवाले बचाए पनि फर्किएको बललाई फाबियान रुइजले गोलमा परिणत गरेका थिए।

तर पहिलो हाफ सकिन चार मिनेट बाँकी रहँदा चार्ल्स डे केटेलारेले टिमोथी कास्टान्येको क्रसलाई हेडमार्फत गोल गर्दै बेल्जियमलाई १–१ को बराबरीमा फर्काए। यो गोलसँगै स्पेनले यस विश्वकपमा लगातार ६४९ मिनेटपछि पहिलो पटक गोल व्यहोरेको थियो।दोस्रो हाफमा बेल्जियमले पेनाल्टीको माग गरे पनि निर्णायकले खेल जारी राखेका थिए। स्पेनका आयमेरिक लापोर्टको हेडर आफ्नै टोलीका रोड्रीको हातमा लागेको दाबी बेल्जियमले गरे पनि रेफ्रीले त्यसलाई अस्वीकार गरेका थिए।स्पेनका मिकेल ओयारसाबालको प्रहारलाई थिबाउट कुर्टुवाले उत्कृष्ट बचाउ गरेका थिए। तर ७१औँ मिनेटमा मांसपेशीमा चोट लागेपछि कुर्टुवा मैदान छाड्न बाध्य भए। उनको स्थानमा आएका सेन्ने लामेन्सले कुबार्सीको प्रहार नियन्त्रण गर्न नसक्दा मेरिनोले त्यसको पूरा फाइदा उठाउँदै स्पेनलाई अन्तिम चारमा पुर्‍याए।

सन् २०१० को विश्व विजेता स्पेनले अब सेमिफाइनलमा युरोपेली च्याम्पियन फ्रान्ससँग प्रतिस्पर्धा गर्नेछ। विश्वकप इतिहासमा स्पेनको यो दोस्रो सेमिफाइनल यात्रा हो।