काठमाडौँ, २९ असार । ललितपुर महानगरपालिकाले आगामी आर्थिक वर्ष २०८२/८३ का लागि प्रविधिमैत्री सहरी विकास योजनासहितको बजेट सार्वजनिक गरेको छ। शुक्रबार नगर सभाबाट सर्वसम्मत रूपमा पारित भएको बजेटमा सूचना प्रविधिको अधिकतम प्रयोगमार्फत सेवा प्रवाह सुधार गर्ने, पूर्वाधारलाई स्मार्ट बनाउने, र ललितपुरलाई ‘आईटी हब’ का रूपमा विकास गर्ने योजना अगाडि सारिएको छ।

महानगर प्रमुख चिरीबाबु महर्जनले ललितपुरलाई नेपालको सिलिकन भ्याली बनाउने सपना देखिएको बताए। उनका अनुसार प्रविधिको सहायताले सहरी पूर्वाधार विकासमा गति दिनुका साथै नागरिक सेवाहरू सरल, पारदर्शी र प्रभावकारी बनाइनेछ।

डिजिटल पूर्वाधार र स्मार्ट सेवा

बजेटमा सबै सडक सञ्जाललाई वेबमा आधारित GIS प्रणालीमा सूचीकृत गर्दै डिजिटल रोड इनभेन्टरी तयार पार्ने, त्यसलाई मर्मत र योजना निर्माणमा उपयोग गर्ने उल्लेख छ। घरहरूको अभिलेखीकरणलाई भवन नम्बरिङ, कर संकलन र प्रशासनिक प्रणालीसँग जोड्ने तयारी समेत गरिएको छ।

विपद् व्यवस्थापनमा समयमै जानकारी दिन ‘अर्ली वार्निङ सिस्टम’ ल्याइनेछ भने फोहोरमैला व्यवस्थापनलाई प्रभावकारी बनाउन ‘एलएमसी गार्बेज अलर्ट एप’ र जीपीएस ट्र्याकिङ प्रयोग गरिनेछ। घरपालुवा जनावरहरूको व्यवस्थापनका लागि ‘एनिमल एप’ को सुरुवात गर्ने तयारी पनि बजेटले संकेत गरेको छ।

रोजगारी र सीप विकासतर्फ पनि प्रविधिको सहारा

‘श्रम संसार’ नामक डिजिटल प्लेटफर्ममार्फत रोजगारदाता र रोजगारी खोज्ने व्यक्तिबीच समन्वय गरिनेछ। साथै, अनलाइन सीप विकास तालिमहरू सञ्चालन गर्दै आन्तरिक रोजगारी सिर्जना गर्न लागिएको छ।

पर्यटन र सार्वजनिक क्षेत्रको पुनः संरचना

पाटन दरबार स्क्वायर र मंगलबजार क्षेत्रलाई ‘नो भेहिकल जोन’ बनाउँदै पैदल र साइकल यातायातलाई प्रोत्साहन दिने निर्णय गरिएको छ। यस्तै, प्रमुख चोकहरूमा इन्टेलिजेन्ट ट्राफिक लाइट प्रणाली जडान गरी ट्राफिक व्यवस्थापनमा सुधार ल्याइने लक्ष्य छ।

सेवा प्रवाहमा समय अनुशासन र पारदर्शिता

सिफारिस तथा सेवा प्रदान प्रक्रियालाई थप व्यवस्थित गर्न टाइम कार्ड प्रणाली लागू गरिनेछ। सेवा एकरूपता कायम गर्न एकीकृत सफ्टवेयर विकास गरिनेछ भने महानगरको आधिकारिक वेबसाइट ‘ओपन डेटा स्ट्यान्डर्ड’ मा आधारित बनाइनेछ, जसले सूचना पारदर्शी बनाउनेछ।

ललितपुरको यो बजेट विकास, प्रविधि र सेवा प्रवाहलाई एकसाथ जोड्ने रणनीतिमा केन्द्रित देखिन्छ। योजनाहरू कार्यान्वयनमा कति प्रभावकारी हुन्छन् भन्ने अबको विषय हो, तर महानगरको दृष्टिकोण भविष्यतर्फ केन्द्रित र डिजिटल युगअनुकूल देखिन्छ।