काठमाडौँ । भोटेकोशी–त्रिशूली नदीमा आएको बाढीका कारण क्षतिग्रस्त भएका १८ वटा झोलुङ्गे पुल मर्मत गरी सञ्चालनमा ल्याइएको छ । ती पुल मर्मतका लागि करिब साढे पाँच करोड रुपैयाँ खर्च भएको छ ।

पूर्वाधार विकास मन्त्रालय, स्थानीय पूर्वाधार विकास विभागअन्तर्गतको सस्पेन्सन ब्रिज डिभिजन कार्यालयका अनुसार बाढीका कारण त्रिशूली करिडोरमा रहेका १८ वटा झोलुङ्गे पुलमा क्षति पुगेको थियो । ती सबै पुल मर्मतपछि सञ्चालनमा ल्याइएको कार्यालयका योजना प्रमुख सहसचिव शङ्कर बुढाथोकीले जानकारी दिए ।उनका अनुसार क्षतिग्रस्त पुलमध्ये ११ वटामा लट्ठा बटारिने, डेक तथा बिम बगाउने र साइडको जाली बगाउनेलगायतका क्षति पुगेको थियो । बाँकी सातवटा पुलमा भने सामान्य क्षति पुगेको थियो ।

बढी क्षति पुगेका ११ वटा पुलमा बटारिएका लट्ठा सोझ्याउने, ह्यान्ड रेल केबल फेर्ने, नयाँ स्टिल डेक तथा बिम जडान गर्ने र साइडको जाली राख्नेलगायतका काम गरी मर्मत गरिएको बुढाथोकीले बताए । बाँकी सातवटा पुलमा सामान्य मर्मत गरेर सञ्चालनमा ल्याइएको उनले जानकारी दिए ।

बृहत् मर्मत गरिएका पुलमा नुवाकोटको बेलकोटगढी नगरपालिका–७ र तारकेश्वर गाउँपालिका–२ जोड्ने पिमलटार जागाराम झोलुङ्गे पुल, बेलकोटगढी नगरपालिका–५ र धादिङको गल्छी गाउँपालिका–१ जोड्ने फोस्रेटार झोलुङ्गे पुल तथा बेलकोटगढी नगरपालिका–८ र विदुर नगरपालिका–३ जोड्ने जिलिङस्थित झोलुङ्गे पुल रहेका छन् ।

त्यसैगरी, धादिङको सिद्धलेक गाउँपालिका–३ र बेनीघाट रोराङ गाउँपालिका–३ जोड्ने झोलुङ्गे पुल, नुवाकोटको बेलकोटगढी नगरपालिका–५ स्थित केउरेनी गहते र धादिङको गल्छी गाउँपालिका–१ जोड्ने पुल तथा सिद्धलेक गाउँपालिका–६ र गजुरी गाउँपालिका–१ जोड्ने झोलुङ्गे पुलको पनि बृहत् मर्मत गरिएको छ ।

धादिङको गल्छी गाउँपालिका–१ र वडा नं. ६ जोड्ने महेशदोभान मास्टार झोलुङ्गे पुल, गल्छी–१ र वडा नं. ४ जोड्ने पुल, गल्छी–२ र वडा नं. ४ जोड्ने शीतलबजार क्युरेनीटार झोलुङ्गे पुल तथा नुवाकोटको बेलकोटगढी नगरपालिका–५ र धादिङको गल्छी गाउँपालिका–२ जोड्ने कोल्पु कल्लेरीघाट पुलको समेत बृहत् मर्मत गरिएको कार्यालयले जनाएको छ ।गोरखाको गण्डकी गाउँपालिका–७ र धादिङको बेनीघाट रोराङ गाउँपालिका–७ जोड्ने झोलुङ्गे पुलको पनि बृहत् मर्मत गरिएको छ ।

सामान्य मर्मत गरिएका पुलमा गोरखाको गण्डकी गाउँपालिका–८ र धादिङको बेनीघाट रोराङ गाउँपालिका–५ जोड्ने बादरे झोलुङ्गे पुल, धादिङको सिद्धलेक गाउँपालिका–६ र गजुरी गाउँपालिका–२ जोड्ने बिहानी पम्प झोलुङ्गे पुल तथा सिद्धलेक गाउँपालिका–५ र बेनीघाट रोराङ गाउँपालिका–३ जोड्ने मलेखु झोलुङ्गे पुल रहेका छन् ।

त्यस्तै, धादिङको गल्छी गाउँपालिका–२ र वडा नं. ४ जोड्ने बेल्खु भुतिया झोलुङ्गे पुल, गोरखाको सहिद लखन गाउँपालिका–४ र चितवनको इच्छाकामना गाउँपालिका–४ जोड्ने कुरिनटार (लेवाटार) झोलुङ्गे पुल, धादिङको गल्छी गाउँपालिका–२ र वडा नं. ४ जोड्ने महादेवस्थान झोलुङ्गे पुल तथा गोरखाको गण्डकी गाउँपालिका–६ र चितवनको इच्छाकामना गाउँपालिका–३ जोड्ने फिस्लिङ झोलुङ्गे पुलको सामान्य मर्मत गरिएको कार्यालयले जनाएको छ ।

बाढीबाट क्षति पुगेका सबै पुल सञ्चालनमा आएसँगै सम्बन्धित क्षेत्रका स्थानीयवासीलाई आवतजावत गर्न सहज हुने अपेक्षा गरिएको छ ।