काठमाडौं, ३१ असार। वर्षायामले गर्मीबाट राहत दिलाए पनि घरभित्र ओसिलोपन, गुम्सिएको वातावरण र दुर्गन्धजस्ता समस्या बढाउने गर्छ। हावामा चिस्यानको मात्रा बढ्दा कोठा, दराज, ओछ्यान र भित्तामा ओसिलोपन जम्ने भएकाले ढुसी बढ्ने र अप्रिय गन्ध आउने सम्भावना पनि उच्च हुन्छ।

यस्ता समस्याले घरको वातावरण मात्र होइन, स्वास्थ्यमा पनि नकारात्मक असर पार्न सक्छ। तर केही विशेष प्रकारका इन्डोर प्लान्ट (घरभित्र राखिने बिरुवा) ले हावा शुद्ध पार्नुका साथै अतिरिक्त आर्द्रता कम गर्न र घरलाई ताजा राख्न सहयोग पुर्‍याउँछन्।

पिस लिली (Peace Lily) पिस लिली ओसिलोपन सोस्ने र हावा शुद्ध पार्ने उत्कृष्ट बिरुवामध्ये एक हो। यसले हावामा रहेका बेन्जिन, फर्मल्डिहाइड र कार्बन मोनोअक्साइडजस्ता हानिकारक तत्व कम गर्न मद्दत गर्छ। यही कारणले यसलाई नासाले पनि उत्कृष्ट एयर प्युरिफाइङ बिरुवामध्ये एकका रूपमा उल्लेख गरेको छ। यसले वातावरणमा अक्सिजनको मात्रा बढाउन पनि सहयोग पुर्‍याउँछ।

स्नेक प्लान्ट (Snake Plant) स्नेक प्लान्ट कम हेरचाहमै राम्रोसँग बढ्ने लोकप्रिय इन्डोर प्लान्ट हो। यसले हावा शुद्ध पार्नुका साथै रातको समयमा पनि अक्सिजन उत्सर्जन गर्ने विशेषता राख्छ। ओसिलो वातावरणमा बढ्न सक्ने ब्याक्टेरियाको प्रभाव कम गर्न पनि यो उपयोगी मानिन्छ।

स्पाइडर प्लान्ट (Spider Plant) स्पाइडर प्लान्ट हावामा रहेका विषाक्त ग्यास र अप्रिय गन्ध कम गर्न सहयोगी मानिन्छ। यसलाई कम मर्मतसम्भारमै हुर्काउन सकिन्छ। घरभित्रको हावा स्वच्छ राख्नुका साथै यसले तनाव कम गर्न र सकारात्मक वातावरण सिर्जना गर्न पनि सहयोग पुर्‍याउने विश्वास गरिन्छ।

बोस्टन फर्न (Boston Fern) बोस्टन फर्न आर्द्र वातावरणमा राम्रोसँग फस्टाउने बिरुवा हो। यसले प्राकृतिक रूपमा घरको वातावरणलाई सन्तुलित राख्न मद्दत गर्छ। विशेषगरी बाथरूम वा ओसिलोपन बढी हुने कोठामा राख्न यो उपयुक्त मानिन्छ।

वर्षायाममा घरलाई स्वच्छ, ताजा र स्वस्थ राख्न यी इन्डोर प्लान्ट उपयोगी विकल्प बन्न सक्छन्। नियमित हेरचाहसँगै यी बिरुवाले घरको सौन्दर्यसमेत बढाउँछन्।