स्वास्थ्य बिमा प्रभावकारी बनाउन ईएमआर प्रणाली सुदृढ गर्नुपर्नेमा सभापति शेरचनको जोड
काठमाडौं । शिक्षा, स्वास्थ्य तथा सूचना प्रविधि समिति सभापति डा.ओजस्वी शेरचनले स्वास्थ्य बिमा प्रभावकारी बनाउन इलेक्ट्रोनिक मेडिकल रेकर्ड (ईएमआर) प्रणालीलाई थप व्यवस्थित, एकरूप र सुदृढ बनाउनुपर्ने बताएकी छन् ।

रास्वपाको संसदीय दलको समन्वयमा स्वास्थ्य विभागद्वारा आयोजित ‘स्वास्थ्य बिमा किन थला पर्यो ? उत्तर खोजौँ’ विषयक नीति मन्थन कार्यक्रममा बोल्दै शेरचनले स्वास्थ्य बिमालाई संवेदनशील र विश्वसनीय बनाउन ईएमआर प्रणाली सुधार अपरिहार्य रहेको उल्लेख गरिन् ।
उनले भनिन्, ‘स्वास्थ्य बिमालाई हामीले थप संवेदनशील बनाउनुपर्छ । इलेक्ट्रोनिक मेडिकल रेकर्डिङ प्रणालीलाई चुस्त–दुरुस्त र एकरूप बनाउनु आवश्यक छ । यदि हामीले ईएमआर प्रणालीलाई सुदृढ बनाउन सकेनौँ भने अनावश्यक क्लेमहरू आउने क्रम जारी रहन्छ ।’
उनका अनुसार ती क्लेमहरूको मूल्याङ्कन गर्ने जनशक्ति पनि योग्य र दक्ष हुन आवश्यक छ । ‘ईएमआरको क्लेम हेर्ने व्यक्तिहरू योग्य हुनुपर्छ । यदि योग्य छैनन् भने उनीहरूलाई तालिम दिएर सक्षम बनाउनुपर्छ,’ उनले भनिन् ।
शेरचनले स्वास्थ्य बिमा प्रणालीलाई प्रभावकारी बनाउन प्रविधिमैत्री व्यवस्थापन, दक्ष जनशक्ति र एकीकृत ईएमआर प्रणाली आवश्यक रहेकोमा जोड दिइन् ।