वि.सं. २०८२ मङ्सिर १४ गते आइतवार, तदनुसार ई.सं. २०२५ नोभेम्बर ३० तारिख। सिद्धार्थ संवत्सर चलिरहेको छ र सूर्य दक्षिणायनमै प्रवेश गरिरहेको समय हो। वर्तमान ऋतु हेमन्त, कलिगत ५१२६, शाके १९४७, नेपाल संवत् ११४६, किरात वर्ष ५०८५ तथा मञ्जुश्री वर्ष २८६१, साथसाथै हिजरी सं. १४४७ पनि आजकै दिनसँग सम्बन्धित छन्। काठमाडौँमा सूर्योदय बिहान ०६:३८ बजे र सूर्यास्त साँझ ०५:०७ बजे हुनेछ। मार्गशीर्ष शुक्लपक्ष (थिल्लाथ्व) की दशमी तिथि साँझ ०४:१५ बजेसम्म रहनेछ, त्यसपछि एकादशी लाग्नेछ। उत्तराभाद्रा नक्षत्र बेलुका ०९:११ बजेसम्म प्रभावमा रहनेछ र त्यसपछि रेवती नक्षत्र प्रारम्भ हुनेछ। चन्द्रमा आज पूरा दिन मीन राशिमै रहनेछ। सिद्धि योग मध्यरात्रीपछि ०१:२६ बजेसम्म रहनेछ, त्यसपछि व्यतिपात योग लाग्नेछ। करणतर्फ, सुरुमा गर करण साँझ ०४:१५ बजेसम्म, त्यसपछि वणिज करण भोलि बिहान ०३:२२ बजेसम्म रहनेछ, अन्त्यमा विष्टि/भद्रा करण आउनेछ। आजको आनन्दादि योग स्थिर छ। चन्द्रवर्ण पहेंलो, चन्द्रदिशा उत्तर। योगिनीदिशा साँझ ०४:१५ बजेसम्म उत्तर, त्यसपछि आग्नेय। वारशूल पश्चिम दिशामा पर्दछ। आज धनिष्ठा पञ्चक/सरुन परेको दिन पनि हो। वाणपञ्चक अनुसार चोर वाण बेलुका ०८:५७ बजेपछि लाग्नेछ। नक्षत्र शूल दक्षिणतर्फ र कालराहु चक्रमा कालको दिशा उत्तर तथा पाशको दिशा दक्षिण रहनेछन्।आजका विशेष पर्व/दिवसमा कीर्तिपुरमा इन्द्रायणी यात्रा चलिरहेको छ। साथै आज अन्तर्राष्ट्रिय कम्प्युटर सुरक्षा दिवस पनि हो।आजका प्रमुख मुहूर्तहरू शुभ विवाह, अग्निवास (यज्ञ–हवन), तथा पसल थाप्ने (दोकान खोल्ने)का लागि उत्तम मानिन्छ।

मेष (चु, चे, चो, ला, लि, लु, ले, लो, अ) – मन खिन्न र ऊर्जा कमजोर रहेको महसुस हुन सक्छ । निराशामा बसिरहनुभन्दा सक्रिय बनेर अघि बढ्नु उपयुक्त हुन्छ । लेनदेन र हिसाबकिताबमा विशेष ध्यान दिनुपर्छ, गल्ला–सेफ जस्ता कुरामा पनि सतर्कता आवश्यक छ । नयाँ लगानीका विषयलाई बुझेर मात्र अघि बढ्नु बुद्धिमानी हुनेछ । आज सानो गल्तीले तनाव बढ्नसक्ने हुँदा आफन्तहरूलाई साक्षी वा जमानी बनाउन पाइला नचाल्नु नै राम्रो हुन्छ । आज भाग्यबल ०० प्रतिशत रहेको छ । शुभअङ्क ३, शुभ रङ सेतो र शुभ दिशा उत्तर मानिएको छ । अत्यावश्यक कार्य वा आकस्मिक यात्राका लागि ‘ॐ महाकालाय नमः’ २१ पटक जपेर सुरु गर्नु हितकर हुनेछ ।

बृष (इ, उ, ए, ओ, बा, बि, बु, बे, बो) – कमजोरी पन्छाउँदै लक्ष्यमा केन्द्रित भएर लागे राम्रो सफलता मिल्ने समय हो । अभिभावक वा सिनियरभन्दा भाइबहिनी तथा जुनियरहरूको साथ पाइने दिन छ । राजनीति वा समाजसेवामा अघि सर्नुपर्ने अवस्था आउन सक्छ । शुभचिन्तकहरूको सहयोगले व्यक्तित्वमा निखार आउनेछ, आँट र हिम्मतले काम लिए मनग्गे लाभ हुने सम्भावना छ । आज भाग्यबल ८० प्रतिशत रहेको छ । शुभअङ्क २, शुभ रङ कलेजी र शुभ दिशा पश्चिम अनुकूल रहनेछ । अत्यावश्यक काम अघि बढाउन ‘ॐ हिरण्यगर्भाय नमः’ मन्त्र ७ पटक जप्नु उपयुक्त हुन्छ ।

मिथुन (का, कि, कु, घ, ङ, छ, के, को, ह) – भेटघाटको क्रममा आफ्नो उन्नति, पद वा प्रगतिबारे अनावश्यक चर्चा गर्नु उचित हुँदैन, यसले सम्बन्धमा कडुपन ल्याउन सक्छ।धैर्यपूर्वक काम गर्नु पर्ने समय हो सानो बेवास्ताले पनि ठूलो क्षति हुन सक्छ।अर्काको जिम्मामा काम छाडेर अन्यत्र लाग्नु ठीक हुँदैन।आज आत्मविश्वास, दृढता र परिश्रम बढ्नेछ । व्यवसायमा नोक्सानी हुँदैन तर पारिवारिक वातावरण निरस हुनसक्छ । भाग्यबल १०० प्रतिशत छ । शुभअङ्क १, शुभ रङ कलेजी/गाढा रातो र शुभ दिशा दक्षिण मानिन्छ । आकस्मिक काममा ‘ॐ घृणि सूर्याय नमः’ ७ पटक जप्नु लाभदायी हुन्छ ।

कर्कट (हि, हु, हे, हो, डा, डि, डु, डे, डो) – धार्मिक वा सांस्कृतिक कार्यमा सहभागी भएर सम्मान पाउने समय छ । सीप, बुद्धि र प्रस्तुतिलाई प्रयोग गरेर विशिष्ट व्यक्तिको सद्भाव जुटाउन सकिन्छ । आजको दिन तपाईंकै हातमा छ मेहनत गरे सफलता, अल्छी गरे अवसर गुम्नसक्छ । समस्या भन्दा समाधानमा ध्यान दिनु हितकर हुन्छ । भविष्य सुधार्ने तथा आम्दानी बढाउने योग छ । भाग्यले पनि साथ दिनेछ । आज भाग्यबल ८५ प्रतिशत छ । शुभअङ्क ९, शुभ रङ पहेंलो/सुन्तले र शुभ दिशा पूर्व हो । आवश्यक कार्यको शुभारम्भमा ‘ॐ ग्रां ग्रीं ग्रौं सः गुरवे नमः’ १९ पटक जप्नु फलदायी हुनेछ ।

सिंह (मा, मि, मु, मे, मो, टा, टि, टु, टे) – महत्त्वपूर्ण कार्य आफैँ उपस्थित रहेर गर्नु उचित हुन्छ, कागजपत्र पनि ध्यानपूर्वक पढेर मात्र सहीछाप गर्नु राम्रो हुन्छ । मानसिक तनाव र चिडचिडाहट बढ्नाले परिवार वा साथीहरूसँग मनमुटाव हुनसक्छ । लेनदेनमा सावधानी अपनाउनु जरुरी छ—गिन्ती बिग्रिएर नोक्सानी पर्न सक्छ । सहयोगीहरूको व्यवहारमा फरकपन देखिनसक्ने दिन हो । आज भाग्यबल केवल १५ प्रतिशत छ । शुभअङ्क ८, शुभ रङ गुलाबी/सिन्दुरे र शुभ दिशा उत्तर शुभ मानिन्छ । आकस्मिक कार्य अघि बढाउन ‘ॐ ह्रां ह्रीं ह्रौं सः सूर्याय नमः’ ७ पटक जप्नु राम्रो हुन्छ ।

कन्या (टो, प, पि, पु, ष, ण, ठ, पे, पो) – मनोरञ्जन र सहज वातावरणमा समय बिताउन अनुकूल दिन हो । पार्टनरका भावनालाई कदर गरेमा सम्बन्ध प्रगाढ हुन्छ । झिँझो बढी लाग्ने र साना विवाद आउने सम्भावना भएकाले संयम अपनाउनु राम्रो हुन्छ । कलात्मक क्षेत्र—अभिनय, गायन, नृत्य, भिडियो, सजावट—जस्ता कार्यमा राम्रो हुने योग छ । आज भाग्यबल ४० प्रतिशत छ । शुभअङ्क ७, शुभ रङ रातो र शुभ दिशा पश्चिम हो । अत्यावश्यक कार्य सुरू गर्नु छ भने ‘ॐ लक्ष्मीनारायणाभ्यां नमः’ ११ पटक जप्नु लाभप्रद छ ।

तुला (र, रि, रु, रे, रो, ता, ति, तु, ते) – प्रतिस्पर्धा र परीक्षामा सफल हुने योग छ । राम्रो नतिजा चाहनेहरूले गोप्य रूपमा अध्ययन वा तयारी गर्नु उपयुक्त हुन्छ । कुनै विषयमा अनावश्यक बहस वा तर्क हुनसक्ने भएकाले बोलेर होइन, संयम राखेर काम गर्नुकै फाइदा हुन्छ । कार्यक्षेत्र बाहिरको जिम्मेवारीमा पनि खटिनुपर्नेछ ।अनुशासनयुक्त व्यवहारले सहकर्मीहरू प्रभावित हुनेछन्।आज भाग्यबल १००प्रतिशत छ । शुभअङ्क ६, शुभ रङ पहेंलो र शुभ दिशा दक्षिण हो । आकस्मिक यात्रामा ‘ॐ धन्वन्तरीदेवाय नमः’ ११ पटक जप्नु राम्रो फल दिन्छ ।

बृश्चिक (तो, ना, नि, नु, ने, नो, या, यि, यु) – भाइबहिनी वा छोराछोरीका विषयमा चिन्ता बढ्न सक्छ । मन निराश हुनसक्छ र सहयोगीले वाचा पूरा नगर्ने सम्भावना छ । यद्यपि सन्तान वा कामदारको साथ लिएर व्यवस्थापन सुधर्न सक्छ । बुद्धि, संयमता र समझदारीले कमजोर पक्ष हटाउन सकिन्छ । प्रेम, सद्भाव र शान्त वातावरण अनुभव हुने दिन छ । छोराछोरी वा कनिष्ठबाट खुसी मिल्ने सम्भावना छ । आज भाग्यबल १०० प्रतिशत छ । शुभअङ्क ५, शुभ रङ कलेजी/गाढा रातो र शुभ दिशा पूर्व हो । अत्यावश्यक कामका लागि ‘ॐ भास्कराय नमः’ ७ पटक जप्नु उत्तम हुन्छ ।

धनु (ये, यो, भ, भि, भु, ध, फा, ढ, भे) – घरजग्गा, सेयर वा अचल सम्पत्तिमा लगानी गर्ने उपयुक्त समय हो । बन्दव्यापार वा व्यवसायको विस्तारमा धन खर्चिनुपर्नेछ । पारिवारिक वातावरण अनुकूल रहे पनि कसैले कुरा काट्दा मन खिन्न हुनसक्छ । घरभित्र बाध्यात्मक काममा अलमलिनुपर्ने स्थिति आउन सक्छ । उच्च शिक्षा तथा विदेश अध्ययनका विद्यार्थीले राम्रो नतिजा पाउने सम्भावना छ । आज भाग्यबल १५ प्रतिशत छ । शुभअङ्क ४, शुभ रङ सिम्रिक रातो र शुभ दिशा उत्तर हो । ‘ॐ नमश्चण्डिकायै’ मन्त्र ९ पटक जपेर आवश्यक कार्य अघि बढाउन सकिन्छ ।

मकर (भो, ज, जि, खि, खु, खे, खो, गा, गि) – परिश्रमको उचित प्रतिफल पाइने समय हो यहीबाट शक्ति, प्रतिष्ठा र आत्मविश्वास बढ्नेछ । आन्तरिक ऊर्जा उपयोग गरेर जटिल समस्या पनि सजिलै समाधान गर्न सकिन्छ । सहकर्मीका भावना बुझेर काम गरे पुराना झमेला पनि हट्न सक्छन् । सामाजिक गतिविधिमा अत्यधिक रमाउँदा काममा असर पर्नसक्छ । एकअर्काका कमजोरी बुझेर माफीसहित अघि बढे सम्बन्ध अझ बलियो बन्नेछ । आज भाग्यबल ८५ प्रतिशत छ । शुभअङ्क ३, शुभ रङ गुलाबी/सिन्दुरे र शुभ दिशा पश्चिम हो । आवश्यक कार्यको आरम्भ ‘ॐ विघ्नविनाशिने नमः’ २१ पटक जपेपछि गर्नु राम्रो हुन्छ ।

कुम्भ (गु, गे, गो, सा, सि, सु, से, सो, द) – आम्दानी बढ्ने तथा रोकिएको रकम हात पर्नेको योग छ । सेयरमा लगानी गर्न चाहे अनुभवीको सल्लाह लिनु बुद्धिमानी हुन्छ । धन वा उपहार प्राप्त हुने सम्भावना छ, सिनियर वा हाकिमसमेत खुसी रहने दिन हो । कम बोलेर, संकेत र व्यवहारद्वारा पनि काम अगाडि बढाउन सकिने छ । आज भाग्यबल ७० प्रतिशत छ । शुभअङ्क २, शुभ रङ सेतो/उज्यालो र शुभ दिशा दक्षिण हो । आजका महत्वपूर्ण काम ‘ॐ महालक्ष्म्यै नमः’ ११ पटक जपी सुरु गर्नुपर्छ ।

मीन (दि, दु, थ, झ, ञ, दे, दो, च, चि) – आम्दानी बढ्नेछ । प्रशासनिक वा व्यवस्थापकीय काममा राम्रो सफलता मिल्ने दिन हो । तामा र रातो सामग्रीमा फाइदा देखिन्छ । आत्मबल बढ्ने, घरायसी व्यस्तता समयमै सकिने र पतिपत्नीबीच न्यानोपन बढ्नेछ । नयाँ कुरा सिकेर सीपमा निखार ल्याउन सकिने समय हो । आज भाग्यबल ५० प्रतिशत छ । शुभअङ्क १, शुभ रङ पहेंलो/सुन्तले र शुभ दिशा पूर्व शुभ रहन्छ । अत्यावश्यक कार्य ‘ॐ देवगुरुभ्यो नमः’ १९ पटक जपेर सुरु गर्नु लाभदायक हुन्छ ।